Në një ngjarje që mbledh “të gjithë”, është e pamundur të mos prodhohen lajme. Dhe kështu ndodhi me ceremoninë e shenjtërimit të Katedrales ortodokse “Ngjallja e Krishtit” në Tiranë. Ishin të pranishëm krerët botërorë të Ortodoksisë: Tërëshenjtëria e tij, Patriarku Ekumenik Bartolomeu I, Patriarku i Jerusalemit Theofili III, Patriarku i Rumanisë Danieli, Kryepeshkopi i Greqisë Jeronimi, ai i Qipros Krisostomi, Peshkopi i Kishës Ortodokse Shqiptare në Amerikë, Liolini, Kryepeshkopi i Varshavës, Sava, Patriarku i Serbisë Irinej dhe delegacione të Kishës Ortodokse të Moskës, Gjeorgjisë, Bullgarisë dhe Antiokisë. “Të gjithët” e tjerë ishin tanët: Spektri politik shqiptar dhe drejtuesit e institucioneve: Presidenti i Republikës Nishani, kryetari i Kuvendit, Meta, kryeministri Rama si dhe kryetari i opozitës, Basha. Por “lajmet” u prodhuan nga deklaratat e kryepeshkopit serb Irinej, që iu rikthye pa u lodhur Kosovës si “djepi i Serbisë” duke përfituar nga zemërgjerësia e një interviste televizive, dhe nga dikush që vërtet nuk hapi gojë, por foli me praninë e tij: Veprimtari i “Vorio Epirit”, greko-amerikani Nikolas Gejxh.