Flash Java

Po, por…

Pozita dhe opozita përplasen për rregulloren e parlamentit

Ata në dukje kanë ngjashmëri me fëmijët që banojnë në një pallat, ku herë grinden e herë pajtohen. Por grindjet i nisin kur fillojnë të luajnë “shpiash” dhe “doktorash”… Kjo ka ndodhur edhe me pozitën dhe opozitën shqiptare. Pas një periudhe paqeje relative, ku mungonin akuzat e ashpra dhe përlasjet politike, janë rikthyer qëndrimet ekstreme. Bëhet fjalë për reformat që kërkojnë shumicë të cilësuar votash ku më të debatueshme kanë qenë rregullorja e re e Kuvendit dhe reforma zgjedhore. Pika e parë e diskutimeve në Kuvend ishte për rregulloren e re që shërben për 140 ligjvënësit tanë. Ajo që hapi një debat mes kreut të qeverisë Sali Berisha dhe kryetarit të grupit parlamentar socialist Gramoz Ruçi, lidhej me kohën që i takon kryeministrit në Kuvend. Aktualisht me rregullore që është në fuqi, kryeministri flet sa herë të dojë dhe sa kohë të dëshirojë. Sipas kryeministrit, Rama do t’ja vëjë kufirin tek thana, pasi vetë nuk është deputet. Kjo ka sjellë edhe reagimin e Ruçit dhe në fund seanca është mbyllur me akuza dhe kundërakuza se kush po pengonte, pozita apo opozita. Vështirë se do gjejnë një gjuhë të përbashkët, ndaj nuk është më çudi që të bëhen gati ambadorët e huaj, pasi kanë ca jave që rrinë “pa punë”…

Siri

Sulm mbi gazetarët

Një tjetër humbje për gazetarinë këtë javë, kur dhjetë predha goditën shtëpinë ku prej disa ditësh po qëndronin disa gazetarë të huaj, në lagjen Baba Amr, në qytetin “rebel” të Homsit në Siri. Pasi predha e parë goditi shtëpinë, gazetarët tentuan të largohen, por me goditjen e të dytës, gazetarja Marie Kolvin, reportere franceze me eksperiencë nga fushë-beteja dhe Remi Ohlik, një fotograf i ri në moshë, vdiqën në vend. Tre kolegë të tyre u plagosën rëndë. Meqë Siria nuk lejon gazetarët e huaj në vend, Kolvin ishte bërë një zë i fortë për të dëshmuar tmerret e luftës duke raportuar për rrjetet më të mëdha në botë. Gazetarja e famshme për maskën e saj në sy, të cilin e pati dëmtuar gjatë konfliktit në Sri Lanka, kishte raportuar edhe nga Shqipëria gjatë luftës së Kosovës.

Ekzekutimi

Burri akuzohet…

Që në fillim kur ndodhi ngjarja, dyshimet ishin të forta se në vrasjen e laborantes 33-vjeçare kishte gisht bashkëshorti i saj, njëkohësisht edhe babai i dy fëmijëve. Pa u mbushur ende muaji, polica arrestoi Ilia Bashon i dyshuar si urdhëruesi dhe organizatori i vrasjes së Eleni Bashos. Gjithashtu është gjetuar edhe një mesazh kompromentues ku shkruhej se: “edhe dy ditë dhe mbyllet ky muhabet”… Dyshohet se gjithçka është kryer pas një lidhjeje jashtëmartesore të Ilia Bashos me një vajzë të re në moshë. Por divorci i mundshëm mes çiftit mund të shkaktonte jo pak probleme për burrin. Po sipas policisë, nëse ata divorcoheshin gati gjithë pasuria i takonte Eleni Bashos, sepse biznesi dentar ishte në emër të saj.

OKB

Majko nuk ia del

Kur emri i ish-kryeministrit Pandeli Majko u lakua si një nga personat që mund të zgjidhej në një post të rëndësishëm pranë OKB-së, shumë shqiptarë ia uruan karrierën e re të mundshme. Por Majko nuk ka mundur që të fitojë besimin e Ban Ki Moon-it. Sekretari i Përgjithshëm i OKB, zgjodhi turken Cihan Sultanoglu në krye të Zyrës për Europën e ish-vendet e BS-së. Sipas jetëshkrimit, Sultanoglu ka një përvojë 26-vjeçare në UNDP, nga të cilat 7 vjet ka shërbyer në ish-republikat sovjetike. Para se të merrte detyrën e re, Sultanoglu ishte drejtore e burimeve njerëzore për UNDP. Megjithatë kjo nuk ia ul vlerat kurrsesi Majkos, pasi prej disa muajsh emri i tij u lakua gjatë në zyrat e OKB-së.

Politikanët

Më të paguarit

Pas një klasifikimi të kryer nga Investopedia, kemi mundur të mësojmë për politikanët më të paguar në botë. Sipas të dhënave, politikani që merr më shumë para çdo fund muaj, për funksionet e tij qeveritare, është Li Hsien Long, kryeministri i Singaporit. Në vitin 2010 është paguar deri në 2 milion dollarë. Në vendin e dytë mes dhjetë më të paguarve, është kryeministri i Hong Kongut, Donald Tsang me 513 mijë dollarë. Vendi i tretë për Raila Odingan, kryeministër i Kenias me 427 mijë. Barak Obama është në vendin e katërt me 400 mijë, i pesti Nikolas Sarkozi (302 mijë), i gjashti Stefen Harper, Kanada (296 mijë), e shtata Meri MekAlis, Irlandë (287 mijë), pastaj Julia Gillard, Australi (286 mijë), në vendin e nëntë Anxhela Merkel (283 mijë) dhe i dhjeti, Joshihiko Noda, Japoni (273 mijë).

Kule

Traktet e FRESSH-it

Zgjedhjet për rektorë dhe dekanë të universiteteve janë mbyllur, por sigurisht jo pa debatet dhe përplasjet që i shoqërojnë gjithmonë. Rektori i universitetit të Tiranës, Dhori Kule, nuk ka hezituar të akuzojë Partinë Socialiste se ka bërë përpjekje për të politizuar procesin e zgjedhjes së drejtuesve të rinj në këtë universitet. Me rimandatimin në postin e rektorit, Kule ka thënë se strukturat e FRESSH-it kanë bërë thirrje për të mos votuar pedagogët demokratë. “U bënë përpjekje të paligjshme për të vënë në provë universitetin dhe për të injektuar një virozë helmuese ndaj UT. Jam krenar që ky institucion tregoi që është autonom dhe i dha përgjigje strukturave politike që donin të dëmtonin autonominë”, thënë Kule, duke shtuar se FRESSH-i shpërndau trakte të zeza kundër tij, si në kohën e nazizmit.

Pitella

Titull dhe takime

Është një politikan që shpesh fjala i ngjit dhe nuk lë rast pa shfrytëzuar të vizitojë vendin tonë dhe të japë mesazhe bashkëpunimi për klasën tonë politike. Por kësaj radhe zëvendëspresidenti i PE-së, Xhani Pitella mund të ketë dalë i mërzitur nga bisedimet me politikanët, por me dëshirë ka marrë titullin doktor “Honoris Causa” të akorduar nga Universiteti Medhetar i Shqipërisë. Në ceremoninë e dhënies së këtij titulli të dorëzuar nga rektori i Universitetit Anastas Angjeli, njëkohësisht edhe politikan i së majtës, ishin të pranishë deputetë e ambasadorë. Pitella nuk humbi rastin që praninë në Tiranë ta shfrytëzojë edhe për takime të nivelit të lartë. Mesazhi i tij ishte një: Nuk mund të lejohet që Shqipëria të humbë trenin drejt Europës. Pikërisht kjo ishte edhe arsyeja kryesore e vizitës, duke inkurajuar opozitën që të bëhet pjesë e reformave dhe projekteve për integrimin e vendit tonë në BE.

Konflikti

Grushta mllefi…

Ndoshta tashmë e ka ndarë mendjen se me heshtjen nuk fitohet gjë, ndaj në një kohë të shkurtër është bërë personazh mediatik dhe policor. Ish i përndjekuri politik Gjergj Ndreca që pak ditë më parë goditi me grushte deputetin e PD-së Ilir Rusmajlin, kësaj radhe inatin e ka nxjerrë me ish-hetuesin e tij, që aktualisht punon si avokat. Ndreca ka qenë me disa miq të tij në një lokal pranë selisë së ish-të përndjekurve politik, kur pranë tavolinës së tij pa të ulej Agim Tirana, avokati i njohur tek i cili Ndreca identifikoi hetuesin e çështjes së tij që dhe e ka torturuar. Në drejtim të avokatit ka lëshuar disa grushte dhe më pas behu policia që e shoqëroi për herë të dytë në një kohë të shkurtër. Ai është justifikuar se këtë veprim e ka bërë pasi iu kujtua koha kur Tirana ishte hetues dhe e kishte torturuar.

Miqësorja

Ndeshje me Italinë?!

Janë të shumtë shqiptarët që bëjnë tifo për ekipin italian gjatë kompeticioneve europiane dhe botërore, por mund të vijë edhe një ditë që kombëtarja shqiptare dhe ajo italiane të luajnë një ndeshje miqësore futbolli. Mendohet se në muajin maj mund të organizohet një takim mes tyre, e kjo është konfirmuar edhe nga kreu i FSHF-së Armand Duka, duke lënë të kuptohet se ndeshja mund të zhvillohet në Palestinë. Në muajin maj pritet që të zhvillohet një turne miqësor në Palestinë, ku do të marrin pjesë tetë kombëtare. Këtu pritet të futet në lojë edhe Shqipëria dhe lobingun më të madh për këtë miqësore luksi mund ta bëjë trajneri aktual i kombëtares sonë Xhani De Biazi. Për këtë takim që mund të realizohet, më shumë se rezultati ka rëndësi përballja me katër herë kampionët e botës.

Venezuelë

Sëmundja e Çavezit

Presidenti i Venezuelës, Hugo Çavez nuk i ka shpëtuar ende sëmundjes së kancerit. Madje, së fundi ka deklaruar se do t’i nënshtrohet një ndërhyrjeje të re kirurgjikale pasi doktorët kubanë kanë zbuluar një tjetër masë kanceroze. “Nuk ka asnjë metastazë. Vetëm një masë e vogël në të njëjtin vend në të cilën më hoqën tumorin”, ka qetësuar mbështetësit në televizion. Presidenti 57 vjeçar ka hedhur sërish kandidaturën për të marrë mandatin e katërt në zgjedhjet e ardhshme të 7 tetorit. Ndërkaq, ai theksoi se nuk bëhet fjalë për kancer në mëlçi, siç kishte deklaruar gazetari Nelson Bokaranda në blogun e tij online: “Jam me shëndet të plotë për të përballur edhe këtë betejë”, ka shtuar Çavez. Mandej, ai po mendon që të diskutojë me bashkëpunëtorët e tij se ku duhet ta kryejë këtë ndërhyrje të re, e treta për të hequr një masë tumorale.

KLSH

Kallëzimet e para

Pas ndryshimit të kreut të Kontrollit të Lartë të Shtetit vijnë edhe rezultatet e para, ndonëse për këtë rast hetimet institucionit kanë nisur muaj më parë. Një kontroll i KLSH-së, i kryer gjatë periudhës maj-shtator 2011, ka zbuluar mekanizimin e mashtrimit dhe abuzimit me ligjin nga ana e disa punonjësve dhe zyrtarëve të lartë të Agjencisë së Legalizimeve (në foto drejtori Shaban Memia), si në drejtorinë qendrore, ashtu edhe në degët e rajonit të Tiranës, Durrësit dhe Fierit. Hetimi është shtrirë nga data 1 janar 2009, deri më 30 prill të 2011-s. Përveç abuzimeve të shumta ligjore, KLSH-ja ka zbuluar se ndaj shtetit janë kryer edhe dëme financiare, me vlerë afro 450 mijë dollarë. Masat e kërkuara nga KLSH-ja arrijnë deri në kallëzimin penal të 14 punonjësve për rajonet e agjencisë në Tiranë dhe Durrës.

Gara

Zela vs. Tahiri

Përflitej se ata të dy do të ishin kandidatë për kreun e PS-së në Tiranë, por askush nuk mendonte se do të ishin të vetmit, përballë njëri-tjetrit. Ilir Zela dhe Sajmir Tahiri janë përzgjedhur si kandidaturat që do të kalojnë në zgjedhje e 3 marsit. Kandidatët që iu paraqitën kryesisë socialiste, veç Zelës dhe Tahirit, ishin edhe Erjon Braçe, Ilir Gjoni dhe Andis Harasani, të cilët nuk e kanë pranuar kandidimin. Madje, Harasani është shprehur kundër kandidimit të Tahirit me arsyetimin se ai kishte qenë kryetar i komanduar në PS-në e Tiranës, si rrjedhim ka konflikt interesi. Megjithatë, një nga dy kandidatët, Ilir Zela ka nisur menjëherë fushatën me një thirrje në profilin e tij në Facebook: “Fitorja e PS në zgjedhjet e ardhshme parlamentare kërkon bashkim”, ka shkruar ai.