Albanicus Erectus

Virgjil Muci

Manus lunga di lex. Kjo është një maksimë e njohur latine që në shqip do të thotë “Dora e gjatë e ligjit”, dhe nënkupton se ligji të mbë¬rrin e të ndëshkon kudo që të shkosh. S’do mend që kjo shprehje u shkon për shtat atyre vendeve ku ligji është përmbi gjithçka dhe përmbi gjithkënd, shtete që ndryshe jemi mësuar t’i njohim sipas termit shtet ligjor. Manus corta di lex, Dora e shkurtër e ligjit. Ja sesi do ta përkufizoja zbatimin e ligjit në vendin tonë. Dhe mos mendoni se ky shkrim ngrihet mbi atë qëndrim nihilist aq fort të përhapur jo vetëm në median tonë, por edhe në opinionin e gjerë, por mbi fakte që gjenden para syve të çdonjërit ditën me diell. Mjafton të hysh në një bar ose në një tjetër mjedis publik, të themi spital, për të parë se si është nëpërkëmbur ligji që ndalon pirjen e duhanit.

E megjithatë shembullin më të fundit të shpërfilljes së ligjit e hasim pas gjithë asaj stuhie – mediatike – të ngritur në gotë lidhur me rastin e botimit në shqipe të Mein Kampf-it të Hitlerit. Për hir të së vërtetës e gjithë kjo histori tingëllon tejet anakronike për ta marrë seriozisht dhe të shtyn të vësh buzën në gaz me qesëndi kur sheh e dëgjon mjerimin e diskutuesve që e shohin fjalën e lirë te botimi i veprës së një prej krijesave më të përbindshme të shekullit të njëzetë. Veç kësaj, kushdo që e ka lexuar librin në fjalë është në gjendje të kuptojë se bëhet fjalë për një vepër jo vetëm e thjesht të kapërcyer me vakt e me kohë, por në thelb krejt mediokre. Por ajo që më la pa gojë ishte fakti i qarkullimit të saj në kioska e ndonjë librari, ndërkohë që kushtetuta jonë shprehet qartë e shkoqur kur ndalon botimin e atyre veprave që propagandojnë literaturë fashiste dhe komuniste. E megjithatë, të paktën deri më sot, asgjë nuk e ka penguar botuesin e saj, anonim për hir të së vërtetës, që njëlloj Empedokleu shkoi e u hodh në kraterin e Etnas veç për t’u bërë i famshëm, ta qarkullojë Mein Kampfin e vet, pa e çarë kryet për atë që në botën e qytetëruar quhet ligj dhe kur e shkel përgjigjesh deri më një.