Bar West

Ngjarja e Shekullit

Bota mediatike e Tiranës po zien nga lajmi më i fundit: Botuesi i gazetës “Shekulli”, Koço Kokëdhima, është zgjedhur me shumicë dërrmuese votash të gazetarëve, kryeredaktor i gazetës. “Ishte një fitore e pashpresuar”, tha Koço menjëherë më pas, në një intervistë ekskluzive për gazetën “Shekulli”, “unë edhe më parë, njësoj si tani, u bëja gazetarëve nga tre mbledhje në ditë. Por një ditë e kuptova se tre mbledhje ishin shumë, ndaj vendosa të bëja edhe një zbritje: Të hiqja rrogën e kryeredaktorit dhe ta merrja unë. Në fakt, kjo lëvizje gjendet në pikën shtatë të manualit tim ‘Si të bëhesh milioner’. E hodhëm në votë dhe, çuditërisht, varianti im fitoi si më i miri!”

Luftë maketesh

Këto ditë kryeqyteti shqiptar ziente nga larmia e maketeve. Këtë traditë të bukur e nisi kryetari i bashkisë Lul Basha, që organizoi një shfaqje me maketet më të bukura të bulevardit të zgjeruar të Tiranës, nga të cilat do fitonte më i miri. “Në pritje të projektit të tramvajit”, u tha Basha të pranishmëve, “shijoni pamjet e reja të stacionit të trenit”. Pastaj e kishte rradhën kryetarja e Kuvendit, Jozefina Topalli. Ajo mblodhi qeverinë me kryeministrin në krye, plus miq e dashamirë të artit, dhe u tregoi disa makete të parlamentit të ri. Si Luli, edhe Jozi, folën për vlerën e këtyre projekteve dhe rëndësinë e tyre për cilësinë e jetës së atyre që do t’i fitonin. Ministri i Financave Ridvan Bode, pasi i dëgjoi i mahnitur, u paraqiti edhe ai të pranishmëve maketet e veta: disa pako me bukë peshku, që ishin vizatuar të ngjanin si tufa me euro. “Ja, bre byrazerë”, tha Ridvani, “me këto leka do t’i bejmë këto vepra!”

Veliu dhe Dante

Gazetari i Top Channel-it, Muhamed Veliu, ka përjetuar disa orë speciale këtë javë. Sapo doli nga shtëpia për të shkuar në punë, komshinjtë e ndalonin në shkallë dhe e përgëzonin. Mbërriti në punë, kolegë të njohur e të panjohur e uronin dhe i rrihnin shpatullat: “Bravo Muhamed, të lumtë”, ose “më në fund drejtësia u vu në vend”. Veliu s’po merrte vesh asgjë, por edhe më i habitur ishte gazetari i njohur Ilir Paço. “Ç’ka bërë vaki?”, pyeste Paço, “ç’është kjo zhurmë për një gazetar jo dhe aq të njohur?” Kolegët e sqaruan: “Një agjenci e OKB-së ka vendosur të heqë nga shkollat ‘Komedinë Hyjnore’ të italianit Dante Aligieri, se aty ka vargje që ofendojnë Muhamedin!”

Festë dioniziake

Dita e Verës e kësaj rradhe, u festua në përmasa dioniziake. Qeveria caktoi një datë për zhdukjen e ambalazheve plastike, kryeqyteti u mbush me lule plastike, lëndinat e Elbasanit lundruan në qese e shishe plastike, ndërsa gazetat, ekologjike si gjithmonë, dolën në letër. Ja si e komentuan disa prej tyre këtë ditë të madhe.

-Gazeta Shekulli: “Ballokumet nuk ju bëjnë milioner”

-Gazeta Panorama: “Tirana feston Verën me birra Korça”

-Gazeta Shqiptare: “Korça feston me birra Tirana”

-Gazeta Shqip: “Përziejnë birrat, sherr mes të rinjve”

Gazeta 55: “Qeveria vendos: Diell për Ditën e Verës”

Zëri i Popullit: “Vera me Mollasin të mos presë. Personi nuk është paraqitur”.

Si Shqipëria

Mësohet se qeveria teknike greke ka rënë dakord të paguajë një shumë të majme për drejtuesin e revistës Forbes, Stivin, me kusht që ky të mbyllë gojën për të paktën një vit. Arsyeja është dhënë në një rreth të ngushtë nga kryeministri Papadhimas: “Sapo Forbsi deklaroi se Greqia duhet t’i ngjajë Shqipërisë që të dalë nga kriza, na u dyfishuan vjedhjet e bankave dhe shtëpive. Por nuk është kjo më e keqja: Një skaf plot me hashash, u nis nga Korfuzi drejt… Sarandës!”