Albanicus Erectus

Virgjil Muci

Kam përshtypjen se ditën që festonte njëzetvjetorin e krijimit të partisë, kur vuri re praninë e Jozefina Topallit, përfaqësuese e maxhorancës në pushtet dhe të Edi Ramës, kryetarit të partisë më të madhe opozitare dhe, njëherazi, mëtuesit kryesor për fronin e kryeministrit të ardhshëm, kryetari i PBDNJ-së, Vangjel Dule, është ndjerë pak a shumë si ajo miza që, mbasi i ka hipur kalit, teksa e sheh që vrapon me të katra, për një çast ka menduar, duke u krekosur, se është ajo, pra miza, që e tërheq karrocën dhe jo kali i gjorë. Dhe të mendosh që aktualisht kjo parti ka vetëm një deputet në Kuvendin e Shqipërisë, çka do të thotë, nisur nga një aritmetikë e thjeshtë, se as ngre, as ul në kandar kur vjen puna për të votuar në parlament çështje të rëndësishme, si ajo e presidentit, fjala vjen. Për ironi të fatit, z. Dule ka të drejtë. Tekefundit, duke qenë i lajkuar nga të dyja palët si asnjë forcë tjetër, ai ka të drejtë të zgjedhë nga t’i vijë më për mbarë, dhe dihet se ajo që i volit si atij ashtu dhe mentorëve të tij është qenia në pushtet.

Lypset të kujtojmë këtu se pas zgjedhjeve të vitit 2005, me një piruetë që nuk i linte asgjë mangut asaj të kryer prej një tjetër force politike, e cila, gjithashtu, kishte pasë qenë në koalicion me socialistët, ndërsa sot është zhdukur pa nam e pa nishan ndërkohë që kryetari gëzohen hiret nën hijen e pushtetit të PD-së, partia e Dules kaloi nga aleanca që kishte pasur me socialistët humbës në një tjetër aleancë, atë me PD-në që porsa kishte fituar zgjedhjet, aleancë që zgjati vetëm katër vjet. Pas zgjedhjeve të vitit 2009, PBDNJ e sheh veten në një koalicion mjaft të diskutuar me PS-në, ndërkohë që, jo rrallë, ka dhënë shenja se është e gatshme për të kaluar sërish në korsinë e së djathtës. Ne sot nuk e dimë nga do t’ia mbajë PBDNJ-ja, madje ka të ngjarë që as vetë kryetari i saj të mos dijë një gjë të tillë, mbasi kjo është ndjesia e krijuar pas fjalës së mbajtur në kongres dhe enigmën që shoqëron rebusin e politikës shqiptare dhe atë të fqinjëve tanë të jugut.