Flash Java

Me “miellin” e gjermanit…

Tenderi i dyshimtë dhe reagimi i bankës gjermane

Ishte një tender normal për ndërtimin e linjës së interkonjeksionit Shqipëri-Kosovë, por ka mbetur pezull për shkak se OST-ja nuk ka pranuar që të shpallet fitues kompania që përzgjodhi banka gjermane KFW, që është edhe financuesja e projektit. Lajmi u dha në gazetën “Zëri” në Kosovë, ku u dyshua prej tyre se kjo aferë kishte lidhje me ndikimin e mafias serbe, e cila ka shtrirë “influencën” e saj edhe në Shqipëri. Për ndërtimin e linjës 400 kilovolt ishin afruar dy kompani dhe u përzgjodh kompania kroate “Delekovod”. Projekti me vlerë 75 milionë auro përfshinte dy vendet Shqipërinë dhe Kosovën, nga ku 42 milionë ishin pjesë e vendit tonë. Gjithçka në dukje ishte mirë, por më pas OST-ja, (kompania shtetërore e sistemit të transmetimit), anulloi tenderin, duke pretenduar se kjo vepër duhej të ndërtohej nga kompania tjetër pasi kishte bërë një ofertë më të mirë. Mirëpo gazeta kosovare “Zëri”, shkruan se në këtë lojë janë interesat e një grupi të fuqishëm biznesmenësh serbë dhe qeveria shqiptare i ka mbështetur, duke mbajtuar pezull për shumë kohë këtë projekt. Kjo detyroi Sali Berishën që të dilte në konferencë për shtyp dhe të mbronte idenë e tij, duke sulmuar si gjithnjë opozitën, ndërsa homologu i tij Hashim Thaçi preferoi heshtjen. Por në këtë rast duket se nuk do kenë shumë zë për të ngritur, pasi në mes është pala gjermane që ka hedhur dyshimet e saj.

Vizita

Klinton në Tiranë?

Edhe pse ishte vetëm një dëshirë dhe jo një datë dhe planifikim konkret, Ministria e Jashtme ka nxituar të bëjë publike faktin që Sekretarja Amerikane e Shtetit Hilari Klinton, do të vizitojë Shqipërinë. Sipas Ministrisë së Jashtme, premtimi është marrë nga ministri Edmond Haxhinasto, i cili është takuar me zonjën Klinton në Ministerialin e NATO-s, gjatë vizitës në Bruksel. Ajo ka premtuar se në gjysmën e dytë të këtij viti mund të vizitojë Shqipërinë. Nëse kjo do të ndodhë, për disa javë apo muaj politikanët do e kanë në “axhendën” e përditshme, që me siguri do e konsiderojnë si një shembull që Amerika mbështet vendin tonë. Gjithsesi nëse vizita do të ndodhë, ky do jetë një ogur i mirë edhe për vendin, pasi rrallë qëllon që Tirana zyrtare të jetë vizituar nga personalitete të larta botërore.

Disho

“Hakmarrje” greke

Mjaftoi dënimi i kreut të OMONIA-s në Korçë dhe gjyqtarët që dhanë vendim për të, të shpalleshin “non grada” në shtetin fqinj. E para që është përballur me veprimin e paprecedentë të krijuar nga autoritetet greke ka qenë kryetarja e gjykatës së Apelit Entela Prifti. Por e njëjta situatë ka ndodhur edhe me koleget e saj Brunilda Mano dhe Afërdita Malo. Aty është kuptuar se të gjithë gjyqtarët që morën vendimin për dënimin me një vit burgim të Naum Dishos u shpallën si të “rrezikshëm” për palën greke. Kjo shkaktoi reagim nga tre gjyqtaret të cilët rastin e tyre e bënë publik duke thënë se policët grekë ishin sjellë mjaft keq me ta, pavarësisht se ishin me fëmijë të vegjël. Tashmë duket se kushdo që e ka të shënuar vendlindjen Çamëri dhe të tjerë që “prekin” minoritetin grek, nuk lejohen të kapërcejnë kufirin.

KLD

Plas… sherri

Gati është e kuptueshme që sa herë ka propozime nga presidenti, do të vijë edhe reagimi i kryeministrit dhe pozitës. Kështu ka ndodhur edhe pas mbledhjes së fundit të KLD-së, në lidhje me zgjedhjen e nënkryetarit të saj. Kreu i shtetit propozoi anëtarin Ilir Mustafajn si nënkryetar të KLD-së. Ende pa u diskutuar kjo kandidaturë, Berisha dhe ministri i Drejtësisë Eduard Halimi e konsideruan veprimin e presidentit si antikushtetues. Për ta kjo ishte një përpjekje për të uzurpuar sistemin e drejtësisë. I menjëhershëm ishte edhe reagimi i presidencës që u shprehën se propozimi ishte në përputhje me kushtetutën. Çështja e nënkryetarit të KLD-së pritet që të rindezë debatet dhe të shfaqë edhe një herë luftën tashmë të hapur mes presidentit Bamir Topi dhe kryeministrit Sali Berisha.

Pulitzer

Nderohen gazetarët

Për herë të dytë çmimi i njohur gazetaresk “Pulitzer” iu dha dy gazetarëve të web-it, pas fitores së Propublica.org në vitin 2010. Pulitzer-i është si të thuash Nobel-i i gazetarëve, Graali i Shenjtë për ata që punojnë në botën e informacionit. Megjithatë, juria që vendos për çmimin ka anashkaluar shpeshherë gazetarinë online, pavarësisht se kanë kaluar shumë vite që informacioni në web është kthyer në portal të rëndësishëm të lajmit. Fituesit e çmimit për këtë vit janë “Huffington Post”, blogu i njohur i themeluar nga Ariana Hafington në vitin 2005, dhe Politico.com, një e përditshme online shumë e njohur për karikaturat satirike të Met Vuerker. Ndërsa, David Ud, gazetar i “Huffington Post” e mori çmimin prestigjioz për reportazhet e tij të gjalla mbi veteranët e luftës në Irak e Afganistan.

Titanik

Zbulimi njerëzor

Një foto e shkrepur në vitin 2004, por e papublikuar më parë, tregon se pranë anijes së famshme Titanik mund të jenë disa eshtra njeriu. Në imazh shihet një pallto dhe një palë çizme të mbuluara nga balta. "Nuk bëhet fjalë për këpucë të rëna nga çanta e ndokujt”, ka shpjeguar Xhejms Delgado, drejtues i “Administratës Kombëtare Oqeanike dhe Atmosferike. “Zbulimi nuk lë asnjë dyshim”. Fotoja është shkrepur gjatë një ekspedite të udhëhequr nga “AKOA” dhe nga Robert Ballard, i cili zbuloi mbetjet e Titanikut në vitin 1985. Prania e eshtrave të njeriut mund të nxirrte në pah problemin e mbrojtjes së mbetjeve të anijes. Që kur ajo është zbuluar ka nisur një betejë e gjatë për mbrojtjen e saj nga eksplorimi i egër. Pavarësisht sforcos, qeveria amerikane ka kompetenca të kufizuara, sepse Titaniku është mbytur në ujëra ndërkombëtare.

Ekonomia

Parashikimi i FMN-së

Nuk ka ditë të mira për ekonominë shqiptare. Në parashikimin e vet për ekonominë botërore, Fondi Monetar Ndërkombëtar ka shprehur opinionin se shqiptarët duhet të përgatiten për një periudhë të vështirë shumëvjeçare, me rritje ekonomike shumë të ngadaltë dhe absolutisht më të ulët se sa ajo e vendeve fqinje. Sipas FMN, rritja ekonomike për këtë vit për Shqipërinë parashikohet në masën 0.5 për qind, ndërsa për vitin 2013 do të kemi rritje prej vetëm 1.7 për qind. Ndryshe nga parashikimet e mëparshme, kur potenciali i rritjes ekonomike të Shqipërisë vlerësohej në masën 4-5 për qind, parashikimi i fundit thotë se deri në vitin 2017, Shqipëria do të rritet me mesatarisht vetëm 2.5 për qind. Por, Bosnja, Kosova, Maqedonia dhe Serbia janë vendet që FMN-ja i vlerëson me më shumë potencial se sa Shqipëria.

Përrenjas

AK në Këshill

Është fakt: Këshilli Bashkiak i Përrenjasit do të drejtohet nga kryetari i Aleancës Kuq e Zi për këtë qytezë. Pas disa debatesh të ashpra në mbledhjen e Këshillit bashkiak, PD-ja ka dalë në minorancë dhe drejtimi i organizmit të Bashkisë së Përrenjasit ka kaluar në duart e AK-së, forca politike që u regjistrua para pak ditësh në Gjykatë. Ish këshilltari i Lëvizjes së Legalitetit, Myslim Karriqi i larguar nga kjo forcë politike u zgjodh kryetar i Këshillit Bashkiak të qytetit të Përrenjasit me shumicë votash. Këshilltarët e djathtë janë larguar nga këshilli pas akuzave që shpërthyen fillimisht për çështjen e ndihmës ekonomike, por që në të vërtetë skenari ishte krejt tjetër, rrëzimi i kryetarit aktual Bashkim Vasku dhe zëvendësimin e tij me Myslim Karriqin.

Raporti

PAMECA kritikon

Nënkomisarët e policisë u morën të gjithë në provim nga përfaqësues të PAMECA-s, por vetëm pak prej tyre e kaluan me sukses. Sipas raportit të PAMECA-s, mësohet se Policia e Shtetit krahas disa përmirësimeve ndër vite, vazhdon të vuajë nga korrupsioni, paaftësia profesionale, mungesa e nivelit arsimor apo edhe nga influenca politike. Gjithashtu në raport përmendet edhe mungesa e theksuar e profesionalizmit në disa raste dhe në veçanti në luftën kundër krimit të organizuar. Përveçse drejtuesit e policisë shqiptare janë konsideruar si të paaftë, në shumë raste janë evidentuar edhe të meta të shumta në infrastrukturë. Ajo që është më e rëndë lidhet me emërimet pa kritere profesionale por mbi baza partiake. Ndonëse në sy na thonë fjalë të mira, kur vjen çështja e raporteve që ua dorëzon Komisionit Europian, zyrtarët e PAMECA-s tregojnë të vërtetën e tyre…

Emërimi

Memia “jeton”

U hoq si i paaftë, si një njeri që nuk mundi të çonte deri në fund procesin e koklavitur dhe të shumëpërfolur të legalizimeve të ndërtimeve pa leje, por rikthehet përsëri në detyrë. Tashmë Shaban Memia, ish-kreu i ALUIZNI-t, është emëruar në detyrën e koordinatorit për procesin e legalizimeve në Ministrinë e Punëve Publike dhe Transportit. Sipas ministrit Sokol Olldashi, i cili nuk hezitoi ta prezantonte vetë Meminë, ky pozicion do të shërbejë për të koordinuar punën në terren. Në tetorin e vitit të kaluar Memia u dorëhoq nga ALUIZNI, pasi kishte qëndruar në këtë detyrë që nga viti 2005. Kjo agjenci është kritikuar si për zvarritjet ashtu edhe për korrupsionin në dhënien e certifikatave të legalizimit. Mjafton që të jesh njeriu i partisë, pasi shteti ka xhepa plot për t’i “mbushur” me kuadro…

Miliarderi

Bafet me kancer

Manjati amerikan, Uorren Bafet, ka kancer në prostat. Vetë ai ka bërë të ditur faktin në letrën drejtuar aksionerëve, duke theksuar se nuk është në rrezik jete dhe se nuk do të lërë drejtimin e shoqërisë së tij të investimeve Berkshire Hathaway. Të gjitha testet treguan se nuk ka metastaza: "Jam mirë, kurën do ta filloj në korrik”, tha 81 vjeçari miliarder. Bafet është shfaqur i qetë dhe kanceri i zbuluar në kohën e duhur nuk duket se i rrezikon jetën. Ose kjo është ajo çfarë ai ka shkruar në letër. Prej disa muajsh, miliarderi është bërë i njohur për publikun e gjerë se ka frymëzuar dhe mbështetur reformën fiskale që mban emrin e tij, duke qenë se ishte vetë ai që denoncoi publikisht sistemin fiskal amerikan, i cili favorizon shumë më të pasurit: “Paguaj më pak taksa se sekretarja ime”, kish thënë.

Vizita

Topi takon Ivanov

Thirrje për vetpërmbajtje: Ky ishte mesazhi që Presidenti Bamir Topi dhe homologu maqedonas, Gjeorge Ivanov, dhanë gjatë vizitës së kreut të shtetit shqiptar në Shkup. Topi dhe Ivanov kërkuan zbardhjen e vrasjes së pesë maqedonasve, javën e shkuar, ngjarje e cila krijoi tension ndëretnik mes shqiptarëve dhe maqedonasve. Dy krerët e shteteve kanë shtuar se çdo akt destabilizues dhe kriminal duhet të konsiderohet si i tillë dhe duhet patjetër të vendoset në linjën e hetimit dhe dhënies së drejtësisë sipas ligjit. Ivanov siguroi se institucionet shtetërore në këtë situatë po veprojnë me përgjegjësi të lartë dhe se një gjë të tillë pret edhe nga subjektet e tjera në shoqërinë e këtij vendi. Madje, ai tha se ky tension po nxitet nga qarqe të caktuara të cilët janë të interesuar për të destabilizuar rajonin.