Zbulohen qindra specie të lemerisura

U pikasën teksa tentonin më kot t’u shpëtonin njerëzve

Manaus, Brazil- Një ekip shkencëtarësh që studiojnë pyjet e shiut në Amazonë, deklaruan të hënën zbulimin fantastik të qindra specieve të panjohura më parë të gjitarëve, zvarranikëve, zogjve etj, që po përpiqeshin me dëshpërim të shpëtonin jetën e tyre duke u maskuar nën gurë, gjethe e pemë. Sipas biologëve, ekspedita 16 mujore në kërkim të formave indigjene të jetës në basenin e lumit të Amazonës, ishte një sukses i paimagjinueshëm, teksa grupi arriti të zbulojë dhe katalogojë mbi 900 varietete të paklasifikuara më parë të lemurëve, merimangave, qelbësave e shumë qenieve të tjera që po dridheshin nga terrori i kontaktit me qeniet njerëzore dhe nga frika se mos e pësonin si shumë homologë të tyre.

“Ekspedita jonë dëshmoi se pyjet e Amazonës gëlojnë nga një sasi e madhe krijesash që syri njerëzor nuk i ka pikasur kurrë më parë në këtë rajon”, pohoi udhëheqësi i projektit, profesor Majkëll Lid, i cili personalisht zbuloi një lloj të ri tarantule, teksa krijesa rrekej më kot të fshihej duke u dridhur brenda një zgavre të një trungu tropikal. “Vetëm pak minuta pasi kamionët tanë hynë në pyll, skuadra jonë pati shumë fat sepse dëgjoi qartë qarjen vajtimtare të një lloji të panjohur jaguari, të shtrirë përtokë nën disa gjethe poshtë rrotave të makinave tona”, tha Lid. Në fakt, shtoi profesori, deri në periferitë e rajonit në fjalë u pikasën dy lloje të rralla anakondash që po tentonin me dëshpërim të largoheshin sa më shumë qe e mundur nga pylli. “Kudo që shkonim, pikasëm forma të reja e surprizuese jete”, tha biologu.

Anëtarët e ekspeditës vijuan të përshkruanin gjerësisht sasinë dhe cilësinë e krijesave të rralla që u gjetën duke u dridhur nga frika anembanë pyllit tropikal, përfshirë një flutur mbretëreshë në gjendje të fikëti, dy zogj tukanë aq të stresuar sa kishin humbur gjysmat e pendëve nga lemeria, si dhe një orangutan që zgjohej rregullisht në mes të natës i mbuluar nga djersë të ftohta. “Arritëm madje të pikasim edhe një delfin xhuxh të ujërave të ëmbla, teksa përpiqej me nervozizëm t’i dredhonte kontaktit me ne”, tha Lid, duke theksuar se disa specie ishte e lehtë të identifikoheshin, sepse vraponin, kërcenin ose zvarriseshin me shpejtësi të madhe për të shkuar sa më larg. “Kështu, edhe pse ne e ndoqëm me shpejtësi, delfini u largua drejt bregut tjetër. Madje ai bëri tentativën e dëshpëruar të kërcente nga uji drejt e në pyllin e dendur, me shpresë se do maskohej në mjedis, edhe pse nuk e zotëron këtë cilësi”, pohoi profesor Lid.

Ndërkaq, nuk munguan edhe zbulime surprizuese në lëmin e florës amazoniane. Biologët theksuan katalogimin e rreth 220 llojeve të reja të bimëve dhe pemëve, të cilat në pamundësi për t’u maskuar apo larguar nga vendi, lëshonin toksina të forta vdekjeprurëse sapo prekeshin nga dora e njeriut.

Xhaketa e lëkurës të jep krenari

Studimi: Shumë më tepër sadisfaksion sesa rritja e një fëmije

Tiranë- Një studim i fundit i Institutit të Studimeve Prindërore, botuar në revistën shkencore “Shoqnia e dhondrrit”, bën me dije se posedimi i një xhakete të hatashme lëkure të jep shumë më tepër sadisfaksion dhe ndjesi realizimi në jetë, sepse rritja e një fëmije dhe nxjerrja e tij në jetë. “Kërkimet tona sugjerojnë se ndjesia që të ofron blerja e një xhakete vërtet firmato lëkure, këqyrja e saj e herëpashershme, veshja me kujdes dhe format që merr xhaketa sipas formave të trupit të një të riu, është, me një diferencë shumë të madhe, ku e ku më kënaqësi-sjellëse sesa konceptimi i një bebeje dhe kujdesi për rritjen e saj deri në moshën 18 vjeçare”, shkruan në artikullin e këtij numri, sociologu Murat Murataj, udhëheqës shkencor i institutit në fjalë. Dr. Murataj saktësoi më tej se disa detaje të studimit, e bëjnë edhe më të qartë këtë zbulim. Kështu, kujdesi i rregullt ndaj një xhakete me preçina origjinale dhe me zinxhirë vertikalë inoksi tek mëngët, ishte mesatarisht 63% më sadisfaksuese sesa leximi i përrallave djalit apo vajzës së vogël në shtrat për ta zënë gjumi.

Për më tepër, kur pjesëmarrësve në studim iu ofruan edhe një palë xhinse të zbardhura apo çizme lëkurë model i viteve 70-të nga ato që veshin motoçiklistët amerikanë, atëherë ndjenja e kënaqësisë dhe plotësimit në jetë arrinte nivele që as kishin të krahasuar me momente kaq kalimtare si demek krenaria e prindit për diplomimin universitar të fëmijës së tij. “Pastaj të mos harrojmë”, shtoi dr. Murataj, “edhe raportin kosto-përfitim. Kostoja mesatare e rritjes së një fëmije deri në moshën 18 vjeçare është mbi 30 mijë euro, ndërsa një Golf i përdorur dhe në gjendje të mirë, nuk i kalon 6 mijë eurot”.



Shkurt

Çifti tregohet largpamës

Durrës- Çifti bregdetar Kleo dhe Klea Pupagjeli, deklaruan për reporterët të martën se ata i kishin marrë vazhdimisht masat për të krijuar një llogari borxhi dhe se gjithmonë kishin lënë diçka mënjanë për t’ua pasur borxh bankave dhe kreditorëve, sepse nuk i dihej jetës. “Duke e ditur se mund të vijnë kohë të tjera, ne prej 15 vitesh kemi vënë pak borxh mënjanë çdo vit. Mbase mund të mos jetë shumë, por jemi përpjekur të krijojmë një borxh tonin, sepse të nesërmes nuk i dihet, ndoshta hasim në një periudhë prosperiteti të papritur dhe detyrohemi ta shlyejmë atë”, tha Kleo Pupagjeli, 47 vjeç, duke marrë miratimin me kokë të së shoqes. Kryefamiljari shtoi se nëse gjërat ecin sipas planit, ndoshta këtë borxh e trashëgojnë edhe fëmijët e tij.

Takohet befasisht

Korçë- Plot 20 minuta pasi u takua rastësisht me njohjen e tij të vjetër Vaskë Dacka në supermarket dhe këmbeu disa fjalë, 27 vjeçari Merqez Qylollari ende dridhej nga kjo ngjarje. “Isha në sektorin e parfumeve e shampove për meshkuj, kur më del befas Vaska. Nuk shtiresha dot sikur nuk e pashë, dhe ja ku ishim duke folur për gjëra që nuk ja thosha as kur shoqëroheshim bashkë”, tha Qylollari, që u detyrua t’i tregonte historinë e jetës së tij në pesë minuta. Nga sikleti, djaloshi pas ndarjes u largua drejt sektorit të bulmetrave, pastaj u kthye fshehtas për të vazhduar blerjet. “Nuk mund të blija brisqe, kremra, shampo e solucione personale në sy të tij, nuk kemi aq muhabet”, sqaroi Qylollari.