Flash Java

Referendumi në prag

Importi i plehrave, KQZ miraton kërkesën e AKIP

Kritikat ishin të qarta edhe nga ndërkombëtarët, Komisioni Qëndror i Zgjedhjeve e shkundi veten dhe në fund pas disa “tekave” se firmat e kërkesës për refererendum kundër importit të mbetjeve ka marrë miratimin e anëtarëve të komisionit. Pas diskutimesh të gjata Komisioni Qëndror i Zgjedhjeve ka miratuar kërkesën e Aleancës Kundër Importimit të Plehrave (AKIP), për një referendum kundër importit. Sipas këtij vendimi, kërkesa merr formën e plotë ligjore për dërgimin në Gjykatën Kushtetuese në janarin e vitit të ardhshëm. Përfaqësuesit e AKIP kërkuan që të merrej në konsideratë nisma, pasi në tavolinën e anëtarëve të KQZ-së ndodheshin jo pak por 64 mijë firma qytetarësh. Por pikërisht çështja e firmave hasi në shumë debate, pasi kryetari Ristani u shpreh se shumë firma të verifikuara rezultuan se ishin hedhur nga një person, siç ishte konstatuar edhe nga policia shkencore. Tashmë një hap kryesor është hedhur, nëse edhe vendimi i Gjykatës Kushtetuese është pro referendumit, atëherë për herë të parë në vendin tonë një nismë qytetare mund të dalë edhe kundër qeverisë. Vota e drejtpërdrejtë do tregojë edhe ndjeshmërinë qytetare kundër ligjit të importit të mbetjeve.

Vendimi

Kryeprokurorja gjobitet

Për punën që ka, institucioni që drejton është mësuar gjithnjë që të kërkojë dënim dhe gjobë për shkelësit e ligjit, mirëpo në një rast kryeprokurorja Ina Rama është dënuar me 50 mijë lekë nga Zyra Përmbarimore private për moszbatim të vendimit gjyqësor. Bëhet fjalë për tre vendime gjykate të formës së prerë, sipas të cilave tre prokurorë pasi janë larguar nga puna kanë fituar të drejtën e rikthimit të detyrë. Pavarësisht vendimit, kryeprokurorja nuk ka pranuar rikthimin e tyre. Rama ka kundërshtuar këtë vendim me argumentin se nuk mund t’i rikthente më në detyrë pasi është plotësuar organika e vendeve bosh. Gjithsesi kur është fjala për të zbatuar një vendim gjykate ajo duhet të ndodhë nga të gjithë institucionet, përfshi edhe prokurorinë. Ligjet i njohin mirë, vendimi i formës së prerë nuk mban më diskutime.

Durrës

Grabitet edhe foshnja

Ngjarja për pak mund të kthehej në një tmerr të vërtetë, pasi një grabitës vodhi makinën bashkë me një foshnje të vogël brenda. Kjo ngjarje e rrallë, krejt e pazakontë dhe mjaft e rëndë ndodhi në mes të qytetit të Durrësit. Çifti i ri Mellani me banim në Tiranë, ndaloi në një dyqan frigoriferash në Durrës dhe dolën nga makina duke e lënë ndezur në cep të rrugës, pasi menduan se pak kohë do u merrte interesimi për pajisjet elektroshtëpiake. U desh vetëm një çast që një grabitës ende i paidentifikuar të futet në makinë dhe në pak çaste të zhduket. Grabitësi u nis drejt Tiranës dhe mesa duket nga të qarat e fëmijës dhe frika e ndjekjes së policisë, e la foshnjen pranë një karburanti në Laprakë. Vetë u nis drejt Milotit dhe më pas aty braktisi edhe automjetin. Tmerri për foshnjen dhe prindërit e tyre zgjati gati një orë.

Kuvendi

“Bekohen” ministrat

Edhe pse ndryshimet në qeverinë Berisha u bënë nga rrotacioni i madh i Metës, përsëri mazhoranca miratoi me votat e saj emrat e ministrave të rinj. Sipas ndryshimeve, Edmond Haxhinasto bëhet ministër i Ekonomisë, Edmond Panariti do të kryesojë Ministrinë e Jashtme dhe Vangjel Tavo do të jetë kreu i ri i ministrisë së Shëndetësisë. Ndërkohë i vetmi emër i ri që vjen nga PD-ja është është ai i Flamur Nokës, tashmë do të drejtoje Ministrinë e Brendshme, pas zgjedhjes si president të Bujar Nishanit. Ndërkohë, Kuvendi rizgjodhi Nasip Naçon në postin e nënkryetarit të parlamentit, post të cilin e mbante para se të emërohej në krye të Ministrisë së Ekonomisë. Opozita votoi kundër emrave të propozuar por vota e tyre nuk vlejti shumë në këtë rast, pasi forca e kartonit të pozitës nuk po njeh më rrjedhje. Me përjashtim të deputetit Lefter Koka, që votoi kundër transferimit të kolegut të LSI-së Naço.

Britani

Elisabeta dhe IRA

Një shtrëngim duarsh, një gjest simbolik pajtimi, 14 vjet pasi Armata Republikane Irlandeze (IRA), përfundoi luftën e saj të armatosur kundër pushtetit britanik në Irlandën Veriore. Protagonistë ishin Mbretëresha e Britanisë së Madhe, Elizabeta, dhe ish-komandanti i IRA-s, Martin MekGinis, të cilët u përshëndetën kështu me njëri-tjetrin. Takimi ndërmjet tyre në Belfast ishte i karakterit privat, ndërsa aktualisht, Martin MekGinis është zv.kryeministër në qeverinë e unitetit të Irlandës Veriore. Gjatë tri dekadave të dhunës sektare ndërmjet nacionalistëve romano-katolikë, që dëshironin një Irlandë të bashkuar, dhe unionistëve protestantë, që dëshirojnë që Irlanda Veriore të mbetet pjesë e Mbretërisë së Bashkuar, janë vrarë së paku 3600 vetë, përfshirë më tepër se 1000 ushtarë britanikë.

Uikipedia

Mesazh dashurie

Në epokën 2.0 deklaratat e dashurisë bëhen edhe në Uikipedia. Në faqen italiane të enciklopedisë online të dedikuar “Marrëdhënieve dypalëshe mes Teheranit dhe Romës", është shfaqur ky mesazh: "Irani ka një ambasadë në Romë dhe një konsullatë në Milano, aty ku njoha Makamehën dhe u dashurova pas saj!”. Një gjest ngazëllyes, i cili me siguri e ka prekur vajzën e interesuar, por në të njëjtën kohë ka nxjerrë në pah edhe dobësinë e enciklopedisë. Që do të thotë se Uikipedia është fare e hapur ndaj kujtdo dhe nuk mund të jetë një burim i besueshëm referimi, pavarësisht kontrolleve të shpeshta nga administratorët. Mesazhi në fjalë është postuar vetëm në faqen në gjuhën italiane dhe nuk rezulton absolutisht në versionin anglez ose të një gjuhe tjetër. Kjo ka hedhur dyshime të forta se dashnori i zjarrtë mund të jetë edhe italian.

Moratoriumi

Do lejohen jahtet

Në bregdetin shqiptar do të lejohen mjetet lundruese të klasifikuara si anije me vela apo jahte turistike. Komisioni Parlamentar i Sigurisë Kombëtare miratoi propozimet e mazhorancës për zbutjen e moratoriumit të mjeteve lundruese, por nga ana tjetër ka rrëzuar amendimet e kërkuara nga opozita. Anëtarët e Partisë Socialiste në komision propozuan një amendament që synon të lejojë dhe skafet, gomonet apo anijet prej druri, por me kushtin që të kenë një fuqi motorike të instaluar, jo më të madhe se 40 kuaj fuqi. Sipas nënkryetarit të Komisionit të Sigurisë, Ilir Gjoni, me lejimin e anijeve me vela apo jahteve favorizohen vetëm shtresat e pasura të shoqërisë, ndërsa shtresa e mesme diskriminohet. Ndërsa demokrati Osman Metalla, ka theksuar se lejimi i skafeve do të rikthente trafiqet në bregdet.

Truproja

Ruani ruajtësen

Mund të duket e habitshme, por njeriu që grabiti armën e truprojes së kryeprokurores Ina Rama është një 12-vjeçar. Ai mundi të futej në banesën e Marie Ramajt dhe mori një laptop dhe armën e shërbimit të oficeres së gardës. Mirëpo vetëm ditët e fundit policia mundi të ndalonte të miturin dhe pasi e mori në pyetje ai deklaroi se armën pistoletë tip berreta ia kishte shitur një djali të ri për 30 mijë lekë të reja. Policia e Tiranës pasi mori në pyetje 12-vjeçarin G.P., i cili është i dyshuar për së paku 5 vjedhje banesash në kryeqytet, e la atë të lirë. Në momentin që u grabit shtëpia e Ramajt asnjë nuk ndodhej në shtëpi, ndërsa truproja e kryeprokurores e kishte lënë armën e shërbimit në shtëpi. Nuk dihet nëse është ripajisur përsëri me armë gruaja që ruan kryeprokuroren dhe nëse po, tashmë me siguri që pistoletën e mban me vete, pas asaj që i ndodhi.

Ambientalistët

Në mbrojtje të liqenit

Një përfaqësi e grupit që kundërshton prerjen e pemëve në zonën e parkut të liqenit në Tiranë, për efekt të zgjerimit të rrugës së Elbasanit, kanë vendosur t’i drejtohen organeve kompetente për çështjen. Emra të njohur në fushën e ambientalistëve, urbanistëve, arkitektëve dhe shoqërisë civile kanë depozituar një kallëzim penal në prokurori, në institucionin e policisë ndërtimore dhe Inspektoratit të Mjedisit, duke kërkuar kontrollin e dokumentacionit dhe vërtetimin nëse për nisjen e punimeve në këtë zonë ka një leje ndërtimi apo jo. Sipas ambientalistëve, ajo që po bëhet sot në Liqenin Artificial është antiligjore dhe tërësisht në kundërshtim me ligjin dhe rregullat, të cilat duhen zbatuar për të kthyer sipërfaqet pyjore në rrugë. Ajo që ka revoltuar ekspertë e urbanistë, është mospublikimi i projektit si dhe mënyra sesi po e menaxhon situatën Bashkia e Tiranës.

Lazarat

RENEA qëllohet

Katër efektivë të forcave special RENEA, gati me zvarritje nëpër gëmusha ishin në vëzhgim të parcelave të mbjella me kanabis në Lazarat. Mirëpo sapo iu afruan një pllaje në fund të fshatit, të shtëna të shumta armësh u ndjenë në të gjithë zonën. Tërheqja e trupave speciale ishte e menjëhershme, pasi nuk ishin të përgatitur për të kryer operacion, por të vëzhgonin zonën. Sipas burimeve policore, katër efektivat ishin duke fotografuar dhe filmuar, në mënyrë që në rast operacioni të ishin të përgatitur rreth formës që do të vepronin. Tashmë është e kuptueshme se në Lazarat që “vetëqeveriset” prej disa vitesh, nuk ka vetëm kanabis, por edhe shumë armë. Në raste konfliktesh në këtë fshat një pjesë e madhe e banorëve dalin me armë në duar duke vënë nën shënjestër çdo efektiv që tenton t’u prishë parcelat e kanabisit.

Uikiliks

Peticion Ekuadorit

Xhulian Asanzh po bën gjithçka mundet që t’i shpëtojë ekstradimit në SHBA. Në ndihmë të tij kanë zbritur “në fushë” disa nga figurat më të njohura amerikane. Një letër e firmosur nga personalitete të njohura, mes të cilëve: Majkëll Mur, Oliver Stoun, Noam Çomski dhe Naomi Uolf dhe rreth 4 mijë njerëz të thjeshtë, është depozituar në Ambasadën ekuadoriane në Londër, ku kërkohet dhënia e azilit politik për themeluesin e UikiLeaks. Thuhet se ka një probabilitet të lartë që australiani, i cili javën e kaluar u strehua në ambasadën ekuadoriane për t’i shpëtuar ekstradimit, “do të përfundojë në burg dhe më pas të ekstradohet në SHBA”. Firmëtarët i janë drejtuar direkt presidentit të Ekuadorit, Rafael Korrea, që të pranojë kërkesën, përndryshe Asanzh mund të dënohet me vdekje nëse shpallet fajtor për spinuazh.

Ndërtuesit

Mashtrim me shtëpi

Mund t’ju duket e çuditshme, por janë gjëra që ndodhin. Me dhjetëra qytetarë të Fierit dhe zonave përreth janë bërë pre e mashtrimit të dy biznesmenëve në fushën e ndërtimit. Ideja ishte e thjeshtë: Nga verifikimet e hetuesve mësohet se ndërtuesit, në të paktën 15 raste, të njëjtën shtëpi ua kanë shitur personave të ndryshëm. Por, ka pasur raste, kur një shtëpi rezulton t’u jetë shitur edhe tre klientëve të ndryshëm, duke i vendosur ata në konflikt me njëri-tjetrin. Në këto 15 raste, blerësit e të njëjtës shtëpi disponojnë akt shitblerjet e firmosura nga dy ndërtuesit e dyshuar për veprën penale të vjedhjes me anë të mashtrimit. Këta të fundit kanë qenë duke ndërtuar dy pallate në periferi të qytetit të Fierit, pranë vendit të quajtur “Ura e Sheqit”. Shitjet e apartamenteve janë kryer që në projekt, pasi ndërtimi i tyre nuk ka përfunduar ende.