Lart e Poshte

Lart

Mark Marku

Është i vetmi deputet demokrat që ka folur hapur kundër ndryshimeve në qeveri. Është shprehur pa dorashka, pa e vrarë mendjen nëse fjalët e tij mund ta ndëshkojnë në zgjedhjet e ardhshme, por gjithnjë duke shprehur atë që i duket e drejtë, logjike dhe në kohën e duhur për t’u thënë. E kështu, ka kritikuar ashpër kryeministrin Berisha për mënyrën se si i shpërblen me poste funksionarët e tij të përkushtuar partiakë; ka bërë me faj Berishën dhe Metën për kandidimin për President të një emri të përfolur për të kaluarën e tij, si dhe ka shprehur rezerva për procesin e zgjedhjes së Presidentit.



Poshte

Ridvan Bode

Në Ministrinë e Financave ka disa ditë që është krijuar një situatë e turbullt lidhur me tenderin e Lotarisë Kombëtare. Aq sa opozita vijon të këmbëngulë për faktin se ministri Bode po mashtron në deklaratat e tij ose vartësve të tij. Fillimisht u tha se kriteret për Lotarinë Kombëtare i vendosi konsulenti, ndërsa më pas, në një deklaratë tjetër u sqarua se kriteret i ka vendosur jo konsulenti, por një shoqatë për lotaritë. Për më tepër, historia po bie erë monopol e askush s’po bën asgjë.