Flash Java

Këshilla si të BE-së

Shfrytëzoni kohën e mbetur dhe pajtim mes jush…

Pikërisht në momentin që po afron dita kur do të vendoset nëse do pranohemi ose jo si vend kandidat për në BE, të huajt na mbajnë me kurajo. Për ministren e Integrimit Majlinda Bregu, nga plani i veprimit 6 deri në 12, shumicën e prioriteteve janë plotësuar. Gjithsesi pak ditë më parë ishin vetë përfaqësuesit e BE-së që nëpërmjet deklaratave të tyre theksuan se i vetmi prioritet i plotësuar përfundimisht ishte ai i zgjedhjes së Avokatit të Popullit. Nga ana e tij, Etore Sekui, u shpreh se vullneti nga të gjitha palët është esencial për Shqipërinë drejt BE-së. Sipas tij, tashmë dihet qëndrimi i qartë i BE-së që Shqipëria të marrë statusin e vendit kandidat në BE. Pikat më kritike janë funksionimi i sistemit gjyqësor, lufta kundër korrupsionit, heqja e imunitetit dhe çështja e mbrojtjes së të drejtave të njeriut koha tashmë duket se nuk është në favorin tonë, pasi pas pak muajsh pritet të merret vendimi, por të paktën kësaj radhe na dolën “hakut”. Kriteret që përcaktuan ishin të qarta, duke theksuar vazhdimisht se nuk do të kishte dhuratë për vendin tonë nëse nuk i plotësonte kriteret e përcaktuara. Një tjetër çështje që pritet të ketë diskutime dhe që rrezikon marrjen e statusit të vendit kandidat është edhe zgjedhja e presidentit që nuk përfundoi në mënyrë konsensuale.

Nano

Urim e kritika

Edhe pse kohë më parë, Lëvizja Nano për Fitoren e Socialistëve kaloi me pushime deri në shtatorin e këtij viti, përsëri nuk nguron që të duket. Në një deklaratë për mediat, shprehën urimet për 236 vjetorin e Pavarësisë së SHBA-së. Me këtë rast nuk hezituan që të kritikonin edhe mënyrën e ashpër të qeverisjes nga kryeministri Sali Berisha. Nano shprehet në deklaratë se, shqiptarët u janë mirënjohës Shteteve të Bashkuara të Amerikës për mbështetjen e pakursyer dhe parimore që i kanë dhënë kombit dhe vendit në çdo ditë e vit të këtyre 100 viteve të ekzistencës së shtetit shqiptar. Ndërsa duke bërë lidhjen me vendin tonë, theksohet se fatkeqësisht vërehet se kryeministri Berisha vazhdon të spekulojë me kinse luajalitetin e tij ndaj SHBA-së dhe partnerëve të tjerë europianë. Kritika me vend, po Nano ku është?!

Terrorizmi

Ka edhe kështu

Tërrorizmi është kthyer në kryefjalën e ditës në të gjithë botën, por ndonjëherë planet e dikujt që kërkon të bëjë akte terroriste nuk shkojnë siç e ka menduar. Dy persona, të cilët tentuan të merrnin peng një aeroplan civil në Kinë janë rrahur për vdekje nga pasagjerët dhe anëtarët e ekuipazhit. Sipas medias kineze, dy burra tentuan të marrin peng avionin e linjës Tianjin Airlines që po kryente një udhëtim brenda Kinës. Autoritetet shpjeguan se personat që tentuan pengmarrjen qenë muslimanë Ujgurë dhe ata i thanë 101 pasagjerëve në aeroplan se do të merrnin kontrollin, por nuk arritën dot te ndarja e pilotit pasi u rrahën barbarisht dhe u lidhën kokë e këmbë. Aeroplani u kthye në aeroportin e nisjes, ndërsa pengmarrësit u dërguan për mjekime në spital, pa arritur t’i mbijetonin plagëve të marra nga pasagjerët.

Mediat

Thaçi serb?

Ai është luftëtari në sytë e Kosovarëve, por në këndvështrimin e mediave serbe, kryeministri i Kosovës është me gjak serb. Gazeta “Kurir”, shkruan se stërgjyshi i Hashim Thaçit, ishte një prift ortodoks serb, që në fillim të shekullit XX-të u konvertua në mysliman dhe e ndryshoi emrin në Jusuf. Ajo ka paraqitur disa dokumenta dhe dorëshkrime që i kanë siguruar në arkivat e kryeqytetit turk. Pretendohet se stërgjyshi i Thaçit, prifti ortodoks, Radoslav Daniloviç, pas një periudhe si klerik ortodoks ndërroi emrin e tij, duke u quajtur Jusuf Thaçi. Kur la fenë ortodokse Thaçi u martua dhe nga kjo martesë erdhi në jetë babai i kryeministrit të sotëm të Kosovës. Të paktën ky është pretendimi. Sa e vërtetë mund të jetë kjo? Me siguri Thaçi do e kalojë me përbuzje.

KLSH

Kule abuzoi

Vetëm një ditë pasi Rektori i Universitetit të Tiranës Dhori Kule doli në një reagim për skandalin e maturës Shtetërore, u bë pulike edhe një kleçkë nga KLSH-ja. Sipas raportit të Kontrollit të Lartë të Shtetit, janë përdorur 835 euro për pesë ditë shërbimi, të paguara në datën 13 tetor 2009 si shpenzime udhëtimi, dieta për rektorin e UT, Dhori Kule, dhe një prej drejtorëve të tjerë të rektoratit. Mirëpo përveç dietës së plotë, rektori Kule ka përfituar më shumë. Gjithashtu në vitin 2008 pretendohet se në 17 raste, në shumën 6.1 milionë lekë të reja, janë kryer pagesa për orët jashtë orarit në kundërshtim me dispozitat ligjore. Nuk janë vërejtur vetëm abuzime të tilla të “vogla”, pasi ka dyshime serioze edhe tek tenderat e rikonstruksionit të godinave, si dhe blerja e automjeteve.

CERN

Thërrmija e Higsit

Grimca që mund të shpjegojë teorinë e Universit tonë, e quajtur ndryshe edhe si thërrmija e Higsit, ekziston. Këtë e ka konfirmuar, në një konferencë botërore për shtyp, kërkuesit që punojnë në laboratorin “Large Hadron Collider”. Ata që e pranuan ekzistencën e kësaj grimce të pakapshme, ishin kërkuesit që punojnë në dy nga tre eksperimentet që janë instaluar përgjatë 27 kilometrave të përshpjetuesit të qelizave, pra “Atlas” dhe “Cms”. Të dhënat, të cilat u pritën me duartrokitje triumfi, dolën nga eksperimentet Cms, që koordinohej nga amerikani Jozef Inkandela, dhe Atlas, e koordinuar nga italiania, Fabiola Xhanoti. Të dy eksperimentet tregojnë, me një marzh gabimi afër zeros, se grimca e Higsit ka dimensione mes 125 dhe 126 miliard elektronvolt. Në Gjenevë ishte i pranishëm edhe Piter Higs, shkencëtari që teorizoi ekzistencën e grimcës.

Bulqizë

Viktima e radhës…

Nga galeritë e Miniserës së Bulqizës nuk del vetëm krom, por edhe minatorë të copëtuar. Fati i keq kësaj radhe qëlloi për 53-vjeçarin Dilaver Koçi. Ai shkoi për të nxjerrë mineral dhe të merrte 15 mijë lekë të vjetra për të siguruar bukën e përditshme, por doli i vdekur nga galeritë. Pas vdekjes së tij policia arrestoi tre persona që merreshin me administrimin e minierës private. Të tre të arrestuarit akuzohen për shkelje të sigurisë teknike. Koçi humbi jetën në galerinë 41, në një sektor të menaxhuar nga një subjekt privat i zonës. Trupi i pajetë i 53-vjecarit u nxorr pas tre orësh kërkime, nga 500 metër thellësi e minierës, pasi sasia e madhe e dheut të shkëputur e vështirësoi operacionin e kërkimit. Nëntoka e Bulqizës po merr vazhdimisht jetë…

Zharrëz

Verifikim shpërthimeve

Pas ankesave të banorëve të fshatit Zharrëz në rrethin e Fierit, kompania “Albpetrol” ka premtuar se do verifikojë shpërthimet e kryera në puset që shërbejnë për injektimin e ujit me qëllim nxjerrjen e naftës. Banorët, të cilët janë shprehur të shqetësuar se këto shpërthime sjellin lëkundje të forta të tokës, akuzojnë si përgjegjëse për këtë gjë, kompaninë kanadeze “Bankers”. Kompania po formpn një grup pune me specialistët më të mirë në fushën e gjeologjisë dhe nxjerrjes së naftës që disponon kjo shoqëri, puna e të cilëve do të përqendrohet në terren për të provuar nëse shpërthimet e pretenduara nga banorët e Zharrëzës, janë ose jo të vërteta. Gjithashtu, do të ketë verifikime lidhur me mënyrën se si kryhet nga kompania kanadeze injektimi i ujit në puse që shërbejnë për mbushjen e boshllëqeve që krijohen pas nxjerrjes së naftës.

Kriza

Katër vjet bashkë…

Herë nën zë e herë haptas ishte pranuar se vendi ynë po kalonte një krizë të vazhdueshme ekonomike prej të paktën katër viteve të fundit. Ulja e konsumit dhe investimeve po vë në rrezik rritjen ekonomike të Shqipërisë. Këtë e ka deklaruar Guvernatori i Bankës së Shqipërisë, Ardian Fullani, i cili theksoi se kjo situatë mund të sjellë ndikim afatgjatë. Sipas guvernatorit Fullani, në një sërë sinjalesh që vijnë nga sektori real dhe ai financiar, tregojnë që tkurrja e bilanceve të konsumatorit dhe njëkohësisht ngadalësimi i investimeve të përdorura deri tani nga agjentët ekonomikë privatë, si masa mbrojtëse ndaj krizës mund të kthehen në një dëm të prospektit afatmesëm të rritjes ekonomike. Kriza tashmë duket se është ulur këmbëkryq dhe vështirë se do të “ngrihet” edhe për disa kohë.

Francë

Po martesave gei

Çiftet homoseksuale në Francë mund të martohen dhe të adoptojnë fëmijë, duke filluar nga viti 2013. Lajmin e ka konfirmuar kryeministri, Zhan-Mark Ajrol, gjatë fjalës së mbajtur në Parlament. “E drejta për t’u martuar dhe adoptuar fëmijë do të jetë e barabartë për të gjitha çiftet, pa diskriminuar asnjë”, ka shpjeguar ai, duke konfirmuar kështu një nga premtimet elektorale të Presidentit socialist Fransua Holland. “Shoqëria jonë po ndryshon stilin e jetesës dhe sjelljet e saj”, ka vijuar më tej kryeministri. Dhe prova e parë vjen nga bota e rrjeteve sociale. Edhe Facebook, në fakt, i njeh lidhjet gei. Për këtë arsye, është krijuar një ikonë e përshtatshme për njerëzit e të njëjtit seks. Bashkimi i tyre do të shënohet me një simbol të veçantë në profil, të përbërë nga dy burra ose dy gra.

Qeveria

Rriten pensionet

Pensionistët e fshatit dhe qytetit mund t’i gëzohen rritjes së pensioneve, respektivisht në masën 5 dhe 4 për qind. Një vendim i qeverisë, i cili pritet të miratohet, parashikon rritjen e shpërblimit për moshën e tretë, dhe jo vetëm për ta. Ushtarakët, pilotët fluturues, ish-punonjësit e Policisë, detarët apo punonjësit e ndërmarrjeve ushtarake që tashmë kanë dalë në pension, do të përfitojnë një rritje prej 4 për qind të përfitimit. Po 4 për qind pritet që të rriten edhe pensionet e minatorëve. Përfitues të kësaj rritjeje nuk do të jenë vetëm ata që kanë një pension suplementar pleqërie, por edhe ata që kanë përfituar pension të parakohshëm. Kategoria e ushtarakëve dhe gjithë kategoritë e tjera të veçanta kanë përfituar edhe një vit më parë të njëjtën rritje, kurse për fshatin rritja ishte me 7 për qind.

Kosovë

Pa mbikëqyrje

Në takimin e mbajtur në Vjenë, Grupi Ndërkombëtar Drejtues ku bëjnë pjesë Shtetet e Bashkuara të Amerikës, vendet e BE-së që e kanë njohur Kosovën si dhe Turqia, ka vendosur që t’i japë fund fazës së mbikëqyrjes ndërkombëtare të pavarësisë së Kosovës. “E dimë se Kosova do të ballafaqohet me shumë sfida dhe do të duhet të kryejë shumë detyra të shtëpisë, por e dimë po ashtu se ka bërë një punë të mrekullueshme këto vitet e fundit”, është shprehur Grupi Ndërkombëtar Drejtues. Nga ana tjetër, kryeministri Hashim Thaçi e cilësoi një ditë historike për Kosovën, për të cilën ai tha se meritat i ndajnë së bashku institucionet e Kosovës dhe komuniteti ndërkombëtar. Por, edhe pas vendimit për t’i dhënë fund mbikëqyrjes ndërkombëtare, BE-ja do ta vijojë praninë e vet në Kosovë, përmes misionit për polici dhe sundim të ligjit – EULEX.