Flash Java

Vera e zezë

Vrasje dhe aksidente, bilanci tragjik i një jave

Shoqëria shqiptare vazhdon të tronditet e tulatet nga krimet e shpeshta brenda familjes, të cilat që nga e hëna e javës së kaluar janë kthyer në diçka “të zakonshme” për veshët tanë. Java që lamë pas filloi keq mbrëmjen e së hënës me një ngjarje shokuese e cila tronditi Tiranën, kur Hysen Biba, 29 vjeç, hodhi nga dritarja e katit të katër e maternitetit, djalin e tij foshnje 3 ditëshe. Ndërsa Biba është lënë në arrest me burg, u tha se arsyeja e krimit ishte se ai dyshonte për atësinë e fëmijës. Familjarët e tij janë shprehur se Biba ishte prej kohësh i sëmurë mendor, variant i cili është mbështetur edhe nga avokati mbrojtës. Dy ditë pas kësaj ngjarjeje, në Shkodër, babai 45 vjeçar, Mirash Bregu qëlloi me çifte vajzën e tij 14 vjeçe dhe më pas vrau veten. Flitet për një grindje të çastit që çoi në tragjedi. Po atë ditë, në Tiranë, 43 vjeçari Arben Koxhaj vrau me thikë bashkëshorten Manjola, 30 vjeçe. Policia ka thënë se krimi është kryer në banesën e çiftit pas një konflikti për motive të dobëta. Vrasjeve u janë shtuar edhe një sërë aksidentesh rrugore, të cilat kanë sjellë vdekjen e disa shtetasve, kryesisht emigrantë ose pushues të ardhur nga Kosova.

Hetimi

Gati komisionet

Në shtator Parlamenti do të ketë më shumë punë se zakonisht. Partia Socialiste ka vendosur të paraqesë në legjislaturën e re disa nisma të rëndësishme që kanë të bëjnë me ngritjen e komisioneve hetimore. Kryesia e grupit parlamentar të PS-së po shqyrton mundësinë e ngritjes së tri komisioneve të posaçme hetimore: I pari për çështjen e lotarisë kombëtare, licenca e së cilës iu dha kompanisë shtetërore austriake, në një mënyrë të paracaktuar; komisioni i dytë hetimor, për lejet minerare të shfrytëzimit në Bulqizë, për të cilat opozita ka ngritur vazhdimisht shqetësimin për mënyrën e dhënies së licencave për shfrytëzimin e minierave të kromit në këtë zonë; i treti, ka të bëjë me hetimin e punës së Ministrisë së Mbrojtjes, që drejtohet nga Arben Imami, ndonëse ngritja e këtij komisioni mbetet ende në shqyrtim e sipër. Pra, përpara kemi një vjeshtë të nxehtë.

Burgjet

Nga Anglia në Shqipëri

Diçka më shumë se 100 të burgosur shqiptarë, të cilët vuajnë dënimet në Mbretërinë e Bashkuar, do të transferohen në Shqipëri për të përfunduar ditët e burgut. Deportimi i të burgosurve bëhet në bazë të një marrëveshjeje të nënshkruar mes ministrit britanik të Burgjeve, Krispin Blunt dhe zëvendësministres së Drejtësisë shqiptare, Brikena Kasmi, për transferimin me detyrim të të burgosurve nga Britania në Shqipëri. Aktualisht janë rreth 180 të burgosur shqiptarë në burgjet e Mbretërisë së Bashkuar, prej të cilëve mbi 100 mund të jenë të ligjshëm për transferim nën këtë marrëveshje. Marrëveshja do të duhet të ratifikohet nga Parlamenti shqiptar dhe pastaj t’i dërgohet Parlamentit britanik. Ndërkaq, autoritetet angleze të sistemit të burgjeve janë duke identifikuar të burgosurit shqiptarë që plotësojnë kriteret për t’u transferuar në vendin tonë.

Kosta Rika

Zv.ministrja erotike

Një video e nxehtë e xhiruar në vitin 2007 për të dashurine saj, në një kohë kur, siç ka pranuar protagonistja, ka qenë e ndarë nga burri, ka detyruar zv.ministren e Rinisë së Kosta Rikës, Karina Bolanos, të japë dorëheqjen. Në videon e postuar në YouTube, ajo shfaqet me rroba intime, me gjoksin e madh të dukshëm, ndërsa i drejton një mesazh erotik të dashurit përmes kameras. Veç të tjera, shfaqet edhe disi e ndrojtur: “Po më kërkon shumë, nuk jam mësuar me këto”, justifikohet. Ish zv.ministrja ka shpjeguar se videoja ruhej në një kompjuter të sajin, të cilin ia kishin vjedhur në 2007. Bolanos ka rrëfyer se është viktimë e disa presioneve dhe kërcënimeve prej një viti, por nuk i ka thënë asgjë as burrit dhe as familjes së saj. Presidentja e Kosta Rikas, Laura Kinkila, që është në krizë për disa akuza korrupsioni, shkarkoi zv.ministren sapo videoja qarkulloi në disa faqe të ndryshme interneti.

Romët

Hoxha te avokati

Pas shtatë refuzimesh të njëpasnjëshme, Florenc Hoxha, kreu i policisë bashkiake të Tiranës, ka pranuar të takojë Avokatin e Popullit, Igli Totozani dhe të japë sqarime lidhur me akuzat për dhunë ndaj komunitetit rom. Edhe pse kërkesat për takim nga ana e Totozanit kanë qenë të shpeshta, Hoxha ka refuzuar një takim “kokë më kokë” me të sepse sipas tij, nuk ka asnjë detyrim ligjor për t’u paraqitur tek avokati i popullit, edhe në rast se ai vetë ia kërkon këtë gjë. Kështu, në seancën me pyetje përgjigje që zgjati plot 60 minuta, kreu i policisë bashkiake mohoi të ketë ushtruar dhunë ndaj komunitetit rom, ndërsa theksoi se policët bashkiakë kanë kryer detyrën në përputhje me ligjin. Ndërkaq, në mesjavë, në media u fol për një shkarkim të Hoxhës nga detyra, por ky lajm më pas u përgënjeshtrua nga Bashkia e Tiranës dhe kryetari i saj, Lulzim Basha.

11 shtatori

Të paguajë Irani

Gjashtë miliard dollarë: kjo është shuma e dëmshpërblimit që një gjykatës federal i Manhatanit, Frenk Mas, ka vendosur në favor të familjarëve të 59 njerëzve të vrarë në atentatet e 11 shtatorit 2001. Ata që do të paguajnë shumë, sipas pretencës, do të jenë Irani dhe talebanët e Al Kaedës, të cilët janë shpallur edhe përgjegjës të sulmeve. Gjithsesi vendimi duket më tepër simbolik, pse është thuajse fare e pamundur që të arrihet që Irani dhe talebanët të bëjnë pagesën e caktuar nga gjyqtari, pavarësisht se kjo quhet një fitore ligjore për familjarët e viktimave. Elen Saraçini, gruaja e njërit prej komandantëve të avionëve që u përplasën me Kullat Binjake në Nju Jork, u shpreh e lumtur për vendimin në fjalë. Ndërkaq, presidenti i Iranit, Mahmud Ahmadinexhad, nga ana e tij ka mohuar çdo lloj përfshirje të vendit në atentatet e 11 shtatorit.

Legalizimet

4 mijë tapi

Këshilli i Ministrave vendosi të bëjë kalimin e pronësisë për 3165 pasuri informale që i përkasin rreth 4000 familjeve. Marrja e pronësisë nga poseduesit e objekteve informale dhe kompensimi për ish-pronarët e trojeve vlerësohet si një nga hallkat më të rëndësishme të procesit të legalizimit, vendimmarrje e cila garanton drejtësinë dhe ndershmërinë e këtij procesi për të gjitha kategoritë e përfshira në të. Drejtori i Përgjithshëm i ALUIZNI-t, Ardian Kollozi, ka thënë se për të siguruar ritmet e përshpejtuara me qëllim mbylljen e procesit brenda vitit 2013, do të ketë intensifikim dhe natyrisht transparencë dhe publikim të procedurës së kalimit të pronësisë dhe kompensimit të ish-pronarëve. Zyrtari i lartë i legalizimeve ka garantuar se administrata do të jetë në punë edhe gjatë këtij muaji dhe u ka bërë thirrje emigrantëve të japin kontributin e tyre për të mos penguar procesin.

Divorcet

Bum ndarjesh

Të gjithë e pohojnë para zyrës së gjendjes civile ose në institucione fetare se do të jenë pranë njëri tjetrin deri në vdekje, por vjen një ditë dhe premtimi thyhet. Në 7 muajt e fundit, vetëm në Gjykatën e Tiranës ka pasur 1300 çifte të ndarë, që i bie që gjykata për çdo ditë pune ka ndarë 7 deri në 8 çifte kryeqytetase. Dhe paditë civile me objekt “zgjidhje martese” që vijnë e regjistrohen pranë sekretarisë së organit gjykues bëhen gjithmonë më të shumta. Ata që ngrenë padinë në më të shumtën e rasteve janë meshkuj, por vitet e fundit është shtuar ndjeshëm edhe numri i femrave. Martesa duket se po bëhet përherë e më shumë një marrëdhënie delikate për njerëzit, kurse sociologët flasin për ndërtimin e marrëdhënieve të ekuilibruara midis çiftit, i cili për të mirëmbajtur martesën duhet të përpiqet të shmangë kërcitjet, konfliktet dhe thyerjen e saj përmes divorcit.

Rumani

Shpëton Basesku

Referendumi për shkarkimin nga detyra ose jo të presidentit rumun, Trajan Basesku, ka rezultuar i pavlefshëm për shkak të pjesëmarrjes së ulët të votuesve. Byroja Qendrore e Zgjedhjeve ka njoftuar se pjesëmarrja në votimet e së dielës së kaluar ka qenë nën 46 për qind. Sipas ligjit, referendumi kërkon pjesëmarrjen e së paku gjysmës së qytetarëve me të drejtë vote për të qenë i ligjshëm. Basesku, i cili ka kërkuar bojkotimin e votimeve, ka thënë për televizionin kombëtar të Rumanisë se, “rumunët kanë shfuqizuar referendumin duke mos marrë pjesë në të”. Presidenti u pezullua nga Parlamenti pas një sërë veprimesh që kanë çuar në paralajmërimet e Bashkimit Europian dhe të Shteteve të Bashkuara në lidhje me shkelje të demokracisë. Qeveria e qendrës së majtë e kryeministrit Viktor Ponta e akuzon Baseskun e qendrës së djathtë për tejkalim të autoritetit të tij dhe për ndërhyrje në punët e qeverisë.

Konflikti

Hetohet Dragi

Shefi i Bankës Qendrore Europiane, Mario Dragi, është duke u hetuar për një konflikti të mundshëm interesi, për shkak të anëtarësimit të tij në një klub të bankierëve më të fuqishëm të botës që quhet “Grupi i të 30-ëve”. BQE konfirmoi se ka marrë një kërkesë për hetim nga Ombudsmani i BE-së dhe se do të kthejë përgjigje në kohën e duhur, ndërkohë e ka refuzuar pretendimin se anëtarësimi i Dragit në klubin ekskluziv bie ndesh me etikën e kodit të bankës. Ankesa është bërë një muaj më parë nga Observatori i Korporatës Europiane, një grup transparence me bazë në Bruksel, që e ka kritikuar anëtarësimin e Dragit në një grup lobimi bankar, qëllimi i të cilit është influencimi në debatin për rregullimin e sektorit financiar. Dragi u vu në qendër të vëmendjes menjëherë pas ardhjes në detyrën e shefit të BQE-së për të kaluarën si menaxher në bankën amerikane të investimeve “Goldman Sachs”.

CEZ

Kukësi dhe dritat

Kompania e shpërndarjes së energjisë elektrike CEZ prej ditësh po përballet me protestat e banorëve të disa fshatrave në Kukës për arsye se u ka ndërprerë energjinë elektrike. Sipas Cez-it, borxhi i këtyre fshatrave arrin 100 për qind. Të organizuar, grupet e punës së kompanisë kanë stakuar linjat ndaj familjeve debitore, por që këtu kanë nisur edhe përplasjet fizike me banorët. Në fshatin Breg Lumë të Komunës Tërthore, banorët u kanë dalë në pritë punonjësve të kompanisë, ku me mjete rrethanore, kryesisht shkopinj, kanë nisur të godasin personelin dhe mjetet e transportit të CEZ, duke krijuar dëme. Sakaq, në një deklaratë për shtyp, kompania ka theksuar se nuk do të tërhiqet nga plani i ndërprerjes së furnizimit me energji ndaj debitorëve. Vetë banorët shprehen se nuk kanë mundësi të paguajnë dritat për shkak se jetojnë në varfëri ekstreme.

Shpërblimi

Për bluzat e bardha

Instituti i Sigurimeve të Kujdesit Shëndetësor u ka bërë “dhuratë” bluzave të bardha, për pushimet e verës, një shpërblim deri në një rrogë. Kështu, infermierët dhe personeli mbështetës në qendra shëndetësore, poliklinika, në të gjithë vendin, do të marrin shpërblim një rrogë shtesë, si bonus për gjashtëmujorin e parë për vitin 2012-të. Pagesa dysheme për një mjek që punon në qendër shëndetësore apo poliklinikë është rreth 40 mijë lekë të reja, por në varësi të vjetërsisë së punës, kushteve dhe zonës ku ushtron profesionin, përfitimi është edhe më i madh. Punonjësit e qendrave shëndetësore të rajoneve të Tiranës, Vlorës, Dibrës, Korçës, Elbasanit, Beratit, Shkodrës, Gjirokastrës, do të kenë përfitime më të larta, pasi kanë realizuar më mirë treguesit e cilësisë e performancës. Për gjashtëmujorin e parë të këtij viti, parashikohet të shpërndahen rreth 320 milionë lekë.