Tiranë- Gazetari me një përvojë 20 vjeçare Merqez Kumari, shpalosi dje edhe njëherë arsenalin e vet të pashoq në fushën e intervistimit, duke pyetur një peshëngritës të shquar të kombëtares sonë, si u ndje kur fitoi medaljen e argjendtë në një kompeticion ndërkombëtar. “Medalje argjendi, si ndiheni?”, pyeti me elokuencë Kumari, duke dhënë kështu prova të reja të gazetarisë profesioniste, të aftë në gërmimin e thelbit të çështjes dhe sjelljes tek shikuesi të së vërtetës, profesionalizëm ky që i ka sjellë tre çmime kombëtare në gazetari. “Ndiheni shumë mirë, apo jo”, shtoi Kumari, duke shpalosur taktin e vet ekzemplar dhe duke dëshmuar mjeshtërinë në mbajtjen e gozhduar të teleshikuesit para ekranit. Shembuj të tillë shkëlqimi profesional, Merqez Kumari ka dhënë edhe javën e kaluar, kur iu drejtua kapitenit të një skuadre humbëse në futboll: “Ju e humbët ndeshjen, apo jo?”